春水居

今馬是民國113年正月初1。我生日佇12月，拄過，才滿46歲爾爾。毋過按國曆來算，攏寫47歲，若按農曆來算，48歲矣。

這禮拜放三工假，毋過頭兩工我誠無爽快，尤其是頭一工，頭暈、腰痠，感覺強欲曲去。第二工有較好一寡，剩腰痠、胸悶。今仔日睡醒，感覺齊好矣，一切恢復正常。看khia̋i，睏飽眠治百病。

佇112這冬，前半年我的第七屆囡仔出業，我閣𤆬了一屆，算是完成三冬的工課。後半冬，過專任的生活，雖罔嘛真無閒，毋過心情是輕鬆真濟。猶毋過，這兩工主任來揣我欲去𤆬一个一學期的班，真是驚死人，逐冬攏咧舞這齣，若閣接落我看會無命。

今年，嘛是新冠肺炎結束的一冬，這个病時行三冬，終於收煞，會當恢復正常的生活了。佇這三冬期間，我算是運氣袂䆀，攏無感著。毋過，若是我個人的身體狀況來看，有老人目，月經嘛無啥正常，看來是老矣，差不多更年期矣。

上落尾，我已經學了三个外月的台語矣。佇今年的三月，欲去考C，雖罔我感覺應該是袂通過；毋過，我嘛是真歡喜，終於共過去予我放捒的物件抾回來矣。