這改感冒有夠久。是講我逐擺感冒是攏真久無毋著。 應該是對3/13（四）就開始感覺怪怪囉，到3/15（六）去電頭毛就知影變嚴重矣，頭楞楞，鼻仔澹漉漉。3/17（一）去找陳醫師提藥仔，隔轉工就感覺頭變輕矣，變正常矣。 拜四3/20（四）閣去提第二改藥仔；毋過，一直無斷根，到今3/23（日）仝款毋斷根，已經十工囉。 春天景緻雖然美，毋過真正予人𠢕感冒，有夠歹照顧啦。毋知當時才會齊好？（已經超過半冬無破病，結果春天一到就破功矣）
3/25（二）透早的鼻水黃黃，參進前的白白無仝，所以今仔閣去診所報到。今仔是黃醫師，伊講我鼻竇發炎，所以講話嘛帶鼻音。我共講進前陳醫師有講若閣無好，愛來食抗生素囉，上尾仔，黃醫師共我開啥物藥，我無清楚，毋過真正有效，一食落去，鼻水變甲真少，感覺得欲好矣。真歡喜！（黃醫師順紲看我頂改看病的紀錄，是舊年四月時，所以我差不多一年無感冒矣）