今日四門課。上佮意的是第一門「王羅蜜多」的〈台語文日常事：現流仔佮鐵馬文學〉。這門課講文學創作，講師講甲真幼路，閣分享真濟伊真有意思的作品。這種是我誠愛聽的，所以嶄然仔歡喜。
第二門是明純團長紹介𪜶的「阮劇團」。這門課的收穫較少，因為老師其實是咧紹介這个劇團發展的「歷史」。若是會使提一寡臺語劇本予阮看覓，應該會較好。毋過，台語劇團對我來講是真新奇的，所以嘛有伊的趣味。
這節課予我印象真深的是上尾仔的「觀眾提問」。我感覺這改的學員攏真𠢕問，嘛真有熱情。我想這是因為來參加這改文學營的人大部分攏是有推捒台語的使命感，所以逐家對每一節課都真投入。我有整理起來，逐家差不多問了十个問題，算是真有意思的。
下晡第一節是「台語古詩吟唱」，主講人是秀真老師。這本來就是我有興趣的主題，而且老師有講一寡關於「理論」的內容，所以算是有收穫。這堂課的逐家嘛是予我感覺真𠢕，攏有開嘴綴老師吟詩，而且有問題隨問，不止仔投入閣有熱情。
最尾節是台語配音演員「圓仔姐姐」又菁老師。這堂課參「台語劇團」仝款，攏是收穫較少。毋過，嘛攏因為是較早毋捌聽過的主題，所以真新奇。
這堂課予我印象上深的仝款是學員。老師有設定情境，請七个同學來表演。哇！逐家都真愛演，又閣成又閣好笑，有夠趣味啦。比起來，我實在傷閉思矣，愛較大方咧。
第二工結束，收攤！
文章標籤
全站熱搜
