第三工，仝款四場。
頭一場是裕元老師的「台語老歌的故事」。分六種類型來紹介台語老歌，順紲講一寡仔相關的故事，當然，猶閣有全場大合唱啦，因為是老歌，都算真熟。
有一寡真趣味的代誌，譬論講〈望春風〉的歌詞原版參咱這馬唱的無啥仝、〈雨夜花〉上早的歌詞其實是廖漢臣寫的一條囡仔歌〈春天〉、〈南都之夜〉（我愛我的妹妹呀）前身是〈新台灣建設歌〉。有學員講黃老師其實出幾若本講流行歌的冊，若有興趣會使找來看啦。
第二場是家和老師的「建立像儀式感的台灣款」。這場因為是家和來講，予人真期待。若講上課內容，伊是用歌詞作標題，來講一寡主題。譬論講頭一个是詹雅雯〈出外的囡仔〉，講的是對家己故鄉的認同。第二个是江蕙的〈愛毋著人〉，欲講的是參中國的關係。我感覺這真趣味，原來毋是欲講愛情，伊講的是在地認同吧。
這兩个主題講煞，就來耍Kahoot矣。我掠準題目真簡單，想抉到有困難啦，總共23條，我有一半以上攏臆毋著。所以講我對咱這片土地大大小小的代誌，認捌猶是傷少。
家和攢的有：信仰、食食、工藝、戲劇、物種等主題，毋閣時間傷短說無多濟，真拍損，真想欲聽家和講較濟咧。
下晡，是順聰老師的〈閣來，台語會時行啥貨？台文會變啥魍？〉這嘛是一个作家，毋過，伊不是來分享家己創作的。伊是對真濟方向，來講若欲推捒台語，咱會使創啥。伊講這馬算是台語的2.0，伊向望台語會有制度化（AI）、商業化、美學化的彼工。我想，伊真正看甲真遠，台語猶閣有真長的路愛行。
上尾場，芳玫老師的〈文化冷戰下的台語片〉。予我驚一趒的是芳玫老師竟然用華語講課，伊講伊台語聽有，毋過講了無好。今仔講課的時，伊嘛是有加減講一寡台語，聽得出來真正無啥𠢕講。
這場有看一點仔台語片：辛奇導演的《危險的青春》，主要角色有玉嬋、晴美、魁元三个人。看起來真正好笑，逐家都笑甲真大聲，我感覺台語片嘛有伊真好玩的所在啦。
今仔有佇面冊看著學員佇討論講師講「咱華人」的問題。我有共遐的討論看了矣。原來，毋但「國語」，閣有「華人」這个詞，佇咧使用的時愛佮細膩，若無可能會予人當面糾正啦。
好，第三工，收工。
