春水居

上尾工，上尾場是道聰老師講的「台南太陽公的信仰」。老師學問真飽，分享真濟，伊對台南的信仰了解真深，我想以後會使加去聽伊演講。

結業式時，嘛有請道聰老師起來講話。伊講著台南四百冬：荷蘭38冬、明鄭21冬、清朝212冬、日本50冬、中華民國79冬。遮的數字對我來講嘛算是簡單啦。今年嘛是鄭成功400歲，伊的出生地日本的平戶市固定佇咧7/14舉行生誕祭，就是今仔日，有夠拄好。

上尾節，因為愛拖時間，同款由金安老師來唱唐詩。所以閣唱幾若遍的〈渭城曲〉佮〈菅芒花〉。金安老師干焦有半工無佇咧，其他時間攏陪綴，誠感心。

四工（其實愛算三工啦）的課程結束矣。這改的課程真豐富，方向真廣，有文學（王羅蜜多）、劇團（明純）、電影（芳玫）、配音（又菁）、音樂歌詞（寒袖、裕元）、民俗（道聰）、詩詞吟唱（金安、吳秀真）、台語推廣參認同（家和、順聰），大部分我攏真佮意，有得著真飽滇、豐沛的智識，眼界嘛有加拍予開。

這改閣有一个場外的爭議，就是有學員抗議老師用詞的問題，這嘛是值得重視。我有共逐家討論的內容攏看了矣，講起來是「立場」的問題啦，我了解臺獨派的著急，毋過，有當時仔食緊挵破碗，效果無的確較好啦。